الأحد، 22 يناير 2012

ما سألتش نفسك


ما سألتش نفسك.......................حتي لو بينك وبين نفسك
هي ليه الناس دي بتقول ليه لازم ننزل يوم25يناير نكمل الثورة؟؟؟؟..........اكيد سألت نفسك؟؟؟؟؟
ومجربتش مرة انك تحاول تصل للاجابة علي السؤال ده
طيب..........الناس دي بتقول أن الثورة لسة مكتملتش
طيب.........الناس دي بتقول كده ليه.......اكيد في سبب؟؟؟
واكيد انتا دلوقتي هتقولي ...... خلاص يا عم اقول وأخلص !!
انا بقي هيكون بالي أطول معاك.......وهقولك
أول حاجة الثورة دي قامت ليه....؟؟؟ أكيد هتقول علشان الفقر والظلم والسرقة (عيش وحرية عدالة اجتماعية) .......طيب احنا بقالنا سنة كاملة من وقت اندلاع الثورة لحد دلوقتي وماشفناش اي حاجة من الحاجات اللي انتا قولتها اتحققت.......لسه فيه ابن الباشا وابن الفقير....الناس اللي كانت سارقة فلوسنا......لسه سارقاها.......ولسه لازم نجيب واسطة علشان تعين ابنك ...وعلشان تدخله كلية الشرطة ولا الحربية وكمان النيابة .....يعني ابن القاضي علشان هو قاضي لازم يدخل النيابة لو كان تقديره مقبول وابنك واخوك علشان غلابة ولو متفوق في دراسته بيتقاله انت غير لائق ....هو فعلا غير لائق ولا احنا كمان لائقين ....تعرف ليه؟؟؟؟ علشان ساكتين............. وبنقول أن أحمد زي الحاج أحمد وكلها محصلة بعضها .....وكفاية كده ثورة
طيب سيبك من اللي فاتت
تقدر تقولي حسني مبارك و عياله ومعاونيه اللي قتلوا الشهداء بقالهم سنة رايحيين جايين بيتفسحوا للمحكمة ليه؟؟؟؟ .......طيب انت متوقع ايه في محاكمة مبارك.....؟؟؟؟   هياخد براءة صح....ولا هيتسجن سنة ولا سنتين مش كده
طيب والناس اللي استشهدت في التحرير يروح دمها هدر.......لكن لو كان اخوك اللي اتقتل كنت برضه هتقول كده؟؟؟؟؟
طيب بصراحة كده انت بينك وبين نفسك مش بتقول انها مسرحية وبتتعمل علينا......هما قالوا احنا هنحاكم مبارك في القضاء المدني علشان نقدر نجيب فلوسنا اللي مهربها في الخارج.........طيب حلمت... انت ....ولا سمعت ان في قرش واحد جيه من الخارج من فلوسنا المنهوبه؟؟؟....اكيد   لا
طيب ايه رأيك لو حصل ان مبارك طلع براءة هو واللي معاه ؟؟؟.......  ممكن برضه
مسألتش نفسك مامتك سوزان ليه بره السجن وكل يوم في بلد شكل؟؟؟......عادي برضه
طيب هو اشمعني الناس اللي في التحريرو بتتمسك بتكون المحاكمات بتعتهم سريعة صاروخ........واللي كانوا سارقين البلد بال المحكمة معاهم طويل...ومبلطة في الخط معاهم.....عادي برضه
هو يوسف بطرس غالي......اللي ضارب بفلوسنا وفلوس المعاشات في البورصة وخسرها واللي كان مجوعنا ........لحد دلوقتي معرفش المجلس العسكري يجيبه بالبوليس الدولي....او حتي نقاطع الدول اللي مأوياهم ؟؟؟؟.....عادي برضه
طيب احنا يا سيدي مش عايزين بطرس غالي ولا غيره ......لكن عايزين فلوسنا اللي بره......اللي المجلس العسكري بيقول انه مش قادر يجيبها ....علي الرغم من انها مش صعبة...لان القوانين الدولية بتقول ممكن ...يبقي احنا مش نقول مش عارفين نجيبها....نقول ان الفلوس سايبينها لاصحابها علشان يطلعوا ياخدوها
..........خلاص يا عم سيبك من دي كمان
طيب ماسألتش نفسك ليه كل يوم فيه مشكلة شوية الانابيب وشوية البنزين وغيره....وكل ماتسأل يقولوا الاقتصاد وقع في الثورة.....ومعندناش فلوس والدولة اقتصادها اتهد ولازم نستحمل بعض علشان نبني....وفجأة....تشوف خبر ان فيه عندنا منجم دهب فيه تلت مخزون العالم من الدهب  والمنجم ده بيطلع في اليوم الواحد بــ25مليون دولار دهب خام يعني بحسبة بسيطة في السنة 100 مليار دولار(اخضر) ...ده غير قناة السويس....ولا الغاز اللي بنصدره للكيان الاسرائيلي بتراب الفلوس ....وحقول البترول والكهرباء وأكتر من كده بكتييييييير.......طيب طول ما في الفلوس دي كلها بتقولوا ليه البلد اقتصادها وقع؟؟؟؟؟.......ماتعرفش ياخويا
طيب مسألتش نفسك الناس دي بتقول ليه(((يسقط يسقط حكم العسكر)))
اكيد وجهة نظر...........نسمعها
الجيش في اي بلد ذي ماأنت عارف شغلانته حماية حدود البلد وهو ده اللي كلنا عارفينه يعني مكانه مش في السلطة ولا الحكم...........عساكر الجيش بيقبضوا مرتباتهم من الضرايب اللي احنا بندفعها علشان يحرسونا ....مش علشان يضربونا ويسحلونا ويعروا بناتنا
هتقولي هما حموا الثورة..........طيب يا عم كتر الف خيرهم......وخلاص احنا بقي عندنا مجلس شعب منتخب وممكن هو يكمل اللي باقي في الطريق.....والحمد لله الشرطة اديها شغالة بالزق ...وان شاء الله هنعرف نصرف امورنا في الكام شهر اللي جايين......دي حاجة
والحاجة التانية ان المجلس العسكري فشل في ادارة البلاد في المرحلة اللي فاتت والدليل علي كده الكلام اللي احنا قولناه
وكمان ضحك علينا وعمل استفتاء علي ست او سبع مواد .....وانقلب علي الشرعية وراح مطلع حاجة اسمها اعلان دستوري فيه 63 مادة .....جابهم منين؟؟؟؟.......مش عارف.......... وبعد كده قالنا الانتخابات التشريعية والرئاسية وبعد كده الدستور ودلوقتي بيقول الخطة اتغيرت والدستور اولا
وده غير انه قال انه هيسيب السلطة بعد ستة اشهر .......وعدت دلوقتي سنة والله اعلم بالباقي مرةيقول هنسيبها في مايو 2013 ومرة في يونيه 2012 والله اعلم هو عايز ايه؟؟؟؟؟
******************تونس*****************
تونس في خلال نفس المدة اللي احنا فيها .......عملوا دستور وانتخابات مجلس شعب وكمان انتخبوا رئيسهم.....يااااااااه .....بالسرعة دي؟؟؟؟.........شوفت بقي .... لو كان فيه نية أنهم يسيبوا البلد كانا زمانا زي تونس يمكن احسن
علي الرغم ان تونس مفيش فيها ربع خيرات مصر ....واقتصادهم دلوقتي زي الفل........ومش تفتكر انهم اثناء الثورة مكانش فيه تخريب؟؟؟؟ بالعكس زي ما أحنا عملنا هما عملوا ويمكن اكتر......لكن الفرق بينا وبينه ان الشعب التونسي عارف هو عايز ايه ؟؟؟واحنا لا.....والجيش بتاعهم عايز يلص ويرجع للحدود......لكن احنا بيتهيألي لأ......الواقع بيقول كده....مكدبتش انا
المهم انت نازل يوم 25 ولا هتتفرج؟؟؟؟
وحتي لو هتتفرج فكر في الكلام ده اللي سمعته ولو حسيت انه صدق وعندي حق... الحق وانزل بسرعة وانضم للناس دي .....ولو معنديش حق في اللي انا قولته افتكر حق الشهيد اللي مات علشان يديلك حريتك

                                                                                                                      ((((حملة ماسألتش نفسك))))
                                                                                                                                       اسوان
                                                                                                                             تحالف قوي الثورة باسوان

ليست هناك تعليقات:

إرسال تعليق